特首梁振英有警隊G4人員保護擋雞蛋，律政司司長袁國強遇襲風險不及CY高，但近期硬推政改「袋住先」都非常惹火，不過司長出席公開場合未見有警員簇擁，通常只得佢個新聞秘書庾志偉Terence陪伴左右，應付傳媒。八方正擔心司長保安不足，唔覺意睇到今期《警聲》，先發覺司長身邊原來長期有便衣「神探」貼身保護。
個神探之唔係又係Terence囉！唔好以為佢做新聞秘書、中等身材、斯斯文文，就係文弱書生，手無縛雞之力，原來佢文武雙全，係輔警高層，去年底仲晉升為高級警司，連梁振英啲G4見到佢都要Sir前Sir後。方丈份人咁小器，會唔會唔抵得？不過唔抵得都冇符，因為G4阿頭都係高級警司，唔通叫佢乜都唔做，淨係陪住特首擋雞蛋咩！八方噚日都有恭喜Terence，佢回覆希望大家多多支持警隊。