人稱元秋嘅民建聯立法會議員蔣麗芸，又被高呼佢嘅意見不代表個黨。
佢噚日朝早出席now新聞台節目《時事全方位》，有個意見令在席嘅民主黨何俊仁同社民連黃浩銘「拍手歡迎」。
「合法可以討論」
事關當何俊仁講緊計劃辭職發動變相公投時，問元秋：建制派夠唔夠膽落場一齊玩？強調可以訂明遊戲規則，講明輸或贏咗之後，兩邊陣營點樣投票吖。
點知元秋大聲疾呼：如果係合法嘅嘢，可以攤開嚟討論㗎。咦，補選係合法㗎喎，即係建制派可以參加？
元秋強調，如果啲條件係攤晒喺枱面，點解大家唔傾得先？仲叫何俊仁同民建聯主席譚耀宗慢慢傾，重申泛民應支持政改，唔可以做永遠嘅反對派。
既然元秋有此提議，八方都問吓譚耀宗接唔接受，阿譚回覆呢啲只係阿Ann嘅個人意見，重申該黨現階段唔會講派唔派人參選喎。