香港電影評論學會噚日公佈「第二十一屆評論學會大獎」得獎名單，劉青雲擊敗張家輝等人，憑《竊聽風雲3》嘅霸氣土豪角色第4度喺評論學會稱帝（見附表），趙薇憑《親愛的》村婦角色成為評論學會影后。青雲先後憑《高度戒備》、《絕世好Bra》同《奪命金》攞過獎，他透過助手對獲獎嘅回應精簡：「是一個很好的開始，真的很開心，意料之外。」
喺名單中陳果導演嘅《那夜凌晨，我坐上了旺角開往大埔的紅VAN》成為大贏家，贏到最佳電影同導演獎。出品人Golden Scene嘅老闆Winnie接受電話訪問時話《紅VAN》係香港獨有嘅作品，佢話：「呢部戲係香港先至有，成件事好香港。點都好續集一定拍，最快年底或者明年初開工。下一個目標應該係金像獎，如果只可以攞一個獎希望會係電影獎，可以代表全部人，咁當然，如果有咁多得咁多就最好。」喺北京做嘢嘅陳果亦透過短訊回應話：「《紅VAN》喺呢幾年來比較特別嘅電影，加上自己咁多年冇拍，呢次得到咁多人歡迎同捧場，好開心。亦都好多謝評論學會畀呢個獎我。」
趙薇封后：謝謝陳可辛
另外，青雲擊敗嘅對手包括《黃金時代》嘅王志文、《紅VAN》嘅林雪、《金雞SSS》嘅張家輝及《大茶飯》嘅黃秋生。
趙薇力壓《竊聽風雲3》嘅葉璇同周迅、《雛妓》嘅蔡卓妍等。趙薇對獲獎話：「非常感謝評論學會給我這個肯定，能得到這個殊榮，感恩，感謝！謝謝陳可辛導演給我這個機會，讓我演出如此難忘真摯的角色。每個拍攝創作的日子裏，都激發我無限能量與激情。讓我深切感受到表演的巨大能量與魅力！謝謝所有劇組的同事們！謝謝親愛的！」
撰文：馮仁昭
評論學會得獎名單
最佳電影：《那夜凌晨，我坐上了旺角開往大埔的紅VAN》
最佳導演：陳果《紅VAN》
最佳編劇：韋家輝、陳偉斌、余曦《單身男女2》、張冀《親愛的》
最佳男演員：劉青雲《竊聽風雲3》
最佳女演員：趙薇《親愛的》
推薦電影：《親愛的》、《黃金時代》、《竊聽風雲3》、《一個人的武林》、《太平輪：亂世浮生》、《魔警》、《點對點》、《單身男女2》、《雛妓》
