近年香港唔少學生都參加交流團，北上學習中國國情，估唔到連一班港區全國政協委員，都要北上研習。八方聽聞，上周二至五，近60名港區政協新丁，包括貴為全國政協委員嘅前政務司司長唐英年，都應邀北上，去到直屬國家教育部嘅國家行政學院上堂聽書學國情，其中港澳辦前副主任陳佐洱更充當星級導師幫呢班新丁「補腦」。
其實呢啲北上研習班，唔止學生老師參與者眾，連特區政府嘅公務員亦不時被安排參加，勢估唔到連政協新丁都要做返學生去聽書。八方問過唐唐發言人，證實唐唐乖乖北上學習。除咗唐唐，八方聽聞研習班成員仲有前廉政專員湯顯明、廠商會前會長施榮懷、警務處前處長鄧竟成，以及現任中聯辦副主任殷曉靜。雖然適逢囝囝房祖名涉容留他人吸毒案開審前夕，據知影星成龍亦有拋低煩腦去上堂。
陳佐洱做星級教授
超齡學生哥，孭住書包上學堂，到底有乜學到？八方據聞一眾導師都係講解中國模式ABCD，主要都係圍繞依法治國、協商式民主進行解讀，其中一堂仲要由之前講明香港應為港青「補腦」嘅陳佐洱出任星級教授，解構吓香港同國家關係，唔知一班超齡學生，係咪有好大收穫呢？
李八方
mailto:[email protected]