估唔到羅馬王子年近40，份人都依然咁鬼馬。周日意甲首都打吡戰，羅馬迎戰拉素喺半場落後兩球嘅劣勢下，托迪下半場發威連入兩球以2:2逼和對手，亦追平咗意甲首都打吡歷來累積入球紀錄11球。托迪入第2球之後好招積，用手機自拍慶祝，球證都算係畀足面，托迪咁玩都冇畀黃牌佢。
梅開二度平入球紀錄
首都打吡一向都係打甩髀，名義上作客嘅拉素，由莫利同菲臘安達臣各建一功，喺半場領先羅馬2:0。易邊後羅馬大反擊，重新開波啱啱過咗3分鐘，托迪接應傳中喺遠柱撞射入網；到64分鐘，托迪以高難度入球幫羅馬扳平，今次都係接應傳中，但難度就更大，飛身窄角度凌空射入。入得咁靚王子自然開心，走去南看台嗰陣，工作人員遞咗部手機畀佢，托迪就用嚟玩自拍。難得嘅係出埋架生搞咁多嘢，球證奧沙圖都忍到手冇出黃牌；僐係啦，話晒托迪縱橫意甲球壇咁多年，江湖地位咁高點都要畀吓面。
到今年9月就滿39歲嘅托迪，入埋呢兩球之後，歷年嚟喺首都打吡累積入咗11球，追平咗名將甸奴達哥斯達（Dino Da Costa）嘅紀錄。達哥斯達喺50年代中加盟，效力咗羅馬6年。
祖記贏波領先3分
托迪喺賽後話：「我哋喺上半場踢得完全唔似樣，但下半場成功扭轉劣勢，證明羅馬係有實力去爭意甲冠軍。作為羅馬人可以追平打吡戰入球紀錄，令我覺得好自豪。去南看台慶祝入球，其實喺過去一周我已經有諗過，我一早叫咗蘭尼（助教）當我入波之後就畀個手機嚟，可以喺打吡戰入波係難能可貴，值得自拍分享。」
雖然打吡戰唔使輸波，托迪又咁開心，但羅馬始終都係失咗兩分，又畀榜首祖雲達斯拉開咗距離。祖記喺周日意甲尾場作客拿玻里以3:1贏波，全取3分之後又將領先優勢拉開到相差3分。
識睇，一定係睇足英台【英波Live】：
http://soccer.appledaily.com
http://bit.ly/engballlive