政改第二階段諮詢啱啱開波，幫港出聲就舉辦論壇收集「民意」。發起人周融「仿效」蔡東豪，即場發表「我恐懼」演說，話好擔心泛民一旦喺選舉當選，香港走向亂局，坊間集體違法云云，呼籲大家2016年立法會選舉剔走泛民喎。周融原本寫好一份演詞，部份內容冇讀到，包括形容提名委員會猶如陪審團：「用他們的知識、智慧及良心，在多至十名以上被提名的人中，選出兩至三個最少機會出亂子的來接受普選的洗禮。」
科大經濟學系教授雷鼎鳴亦有喺座談會表態，佢話特首選舉有得揀係最重要，接受「爛橙」候選人：「你提名出嚟兩個（候選人）係爛橙都係冇事，因為佢（候選人）要贏，一定要走中間路線。」民建聯粗口大狀馬恩國話雖然泛民矢言否決政改，但認為仲有一線生機，因為等一眾泛民因為佔領行動要被判罪服刑時，立法會就可以通過「聯合動議」褫奪佢哋議員資格，泛民就冇咗否決權喎。