民主黨何俊仁呢排因為宣佈政改表決後辭職發動公投，多咗好多上鏡講政改嘅機會，但大家唔好忘記仁哥另一個身份，就係支聯會主席。
上月底先接任嘅仁哥，早前都去過六四紀念館視察。雖然李卓人唔再係阿頭，轉任支聯會秘書，但仁哥笑笑口話唔會放過佢㗎，點可以畀佢咁輕鬆，以後阿人會專責行動項目，佢就負責做多啲長遠策劃同提供新嘅論述。
而佢今年大計之一，包括同年輕人加強溝通，日後會多啲喺網台推廣平反六四訊息，亦會同大專生多啲合作。至於六四燭光集會，當然繼續落力搞，對於有自稱本土派人士話集會只係「行禮如儀」，仁哥反駁話，呢啲悼念係對六四死難者嘅懷念，亦顯示港人維護歷史真相嘅決心同堅持：「如果話搞得唔好就唔做，咁好多嘢都唔使做啦！」