費清有唔少飲食界朋友經常爆料，聽到近日酒店業一個傳聞，有位新娘喺某五星級酒店新娘房打扮得漂漂亮亮，步進Ball Room預備接受祝賀，點知眾賓客尷尬咁望住佢。原來酒店話呢對新人根本冇訂到Ball Room，當晚根本冇婚宴！最終新郎走佬，新娘喊爆離場。
訂四季酒店無畀錢
費清向酒店界朋友八吓，知道原來喺網上爆呢單嘢嘅係當晚表演嘅Band友。新郎哥聘請佢哋嚟，但嚟到唔見新郎，只睇到新娘慘況。Band友上網話自己被呃唔緊要，最多賺少啲，但對新娘嚟講係人生污點。
零售界唔知點解都聽到呢個傳聞，仲爆更多料畀費清聽，話單嘢發生喺四季酒店（圖），新郎哥係有訂過Ball Room擺酒，但一直冇畀訂所以被取消，但新郎卻又竟然有畀錢訂房做新娘房，仲廣邀親友到場，但到婚宴開始時突然失蹤唔見咗人。咁冇交帶嘅新郎哥，據講20零30歲，費清覺得，點可以咁大個人都咁冇責任心㗎，就算悔婚，都應該大方認錯啦。但由於啲親友未畀賀禮同人情，所以唔算係呃錢嘅，不過更令人質疑佢玩鋪勁嘅動機。
酒店友話喎，訂婚禮酒席須約兩星期內交定金，否則一律取消，新人任何一方有懷疑都可以打電話去酒店確認。不過咁，如果連呢啲信任都冇，點做人世呀，但如果唔問，又會唔會落得如斯下場呢？四季酒店就一直冇回覆費清嘅查詢。
費清 ＃要生計，也要生活 ＃毋忘初衷