一位讀者陳先生來電郵云：「最近搵番舊報紙覆看，GG細語2013年11月14日題為，明年大嘈吵，高人講甚準，今年會否請高人再批流年！」
每年呢個時候，總有讀者來郵要求搵高人為新的一年批算，呢位讀者陳先生心水清，仲搵番2013年11月14日嘅舊文嚟講添。因此，左丁山亦翻查呢篇稿以及2014年2月4日「今日立春稿」，睇吓以前有冇亂噏呀？哦，好彩呢兩篇測算未來，竟有少許準確添，先至放下心頭大石，起碼冇誤導大眾吖。
2013年11月14日轉述高人云：「明年仲曳，甲午年之立春八字唔好，火太多太旺，缺水，缺土，無以剋制之，而香港最忌火，我估明年仲會有連場大嘈吵，梁特首難有耳根清淨！」
2014甲午之年，香港果然有政治改革（2017特首普選方案）之大嘈吵，引發七十九日嘅「佔領運動」，撕裂不少群體、個人關係，到目前仍然餘波未了。至於去年2月4日講立春八字，提及：「書云：丙火太多無壬水調和，主剛愎，又無土洩火，主周身火，無處發洩，谷到爆之象。八卦丘話，馬年恐怕（一）火災多，（二）市民火多氣頂谷爆，（三）政治僵局可導致火頭四起，街頭示威多，非港之福也。」
呢三點好似亦中的，有消防員因煤氣爆炸而殉職，十分不幸，令人遺憾。講股市方面，舊稿云：「此外，火剋金，火太多，恐怕今年股市會受制。如欲解此困局，必須金水齊來，秋冬季之首，港運程會好一點，此外，北方屬水，西方屬金，如美國繼續泵水放水，北京亦做放水嘅話，可解香港火多缺金缺水之弊。」
以上亦冇錯吖，全年港股有波幅冇升幅，若非十二月尾升番上去，恒指直情係全年計算，打橫行，而滬港通在十一月十七日（冬季）開通，內地股市（北方）大升，北京只做不說，大規模量寬（減息、變相降準、大規模基建）交投量破頂，係帶動港股回勇嘅主要因素。
去年講得唔算錯，今年壓力甚大，收到讀者來郵之後，立即邀請高人訪問，但仲未約實，還要等人地答覆，預料起碼到二月初先至有材料拼埋一碟，在本欄公諸同好！講開又講，大師傅紫微楊「重出江湖」，受乖仔推動，利用新媒體（互聯網、手機App）傳授紫微斗數、奇門遁甲、風水等術數精義，有緣人自會學得懂。左丁山打電話恭喜楊大師，大師一味呵呵笑，聽笑聲就知佢精神飽滿，八十幾歲仲有大把精力，可喜可賀也！