【本報訊】「我覺得應該有另一個角度去諗嘢。」因為一個念頭，毅然放下筆桿穿起圍裙，劉韻棋（Vicky）由平面設計師走入廚房轉職成主廚，設計與煮食結合取得意想不到的成功。創立的餐廳連續三年獲選米芝蓮一星殊榮，今年Vicky再奪有飲食界奧斯卡之稱的「亞洲50最佳餐廳」頒發「亞洲最佳女廚師」，成為首位港產女廚神。
記者：佘錦洪
遠赴紐約修讀平面設計，求學時的Vicky早已涉獵廚藝世界，「嗰邊好易買到新鮮嘢」，經常動手煮食。畢業後先後在美國及本港廣告公司任職，卻念念不忘爐灶間帶給她的滿足感，「有啲嘢用食物去表達應該更加好」，遂毅然放下已投身6年的行業，前往曼谷巴黎藍帶廚藝學院報讀廚藝課程，開始屬於自己的美術與廚藝結合之路。
善用亞洲食材
Vicky指出，要做高級餐飲（Fine Dining），食物除了味道要好，環境、擺設等亦要配合。餐廳面積較小，但內裏設計就頗為用心，「杯碟都係特別去搵番嚟，加埋開放式廚房，做到有自己嘅特色」。每次上菜，她都將餐碟當成畫紙細心放好菜式，「好似設計咁混合唔同元素」。
Vicky師承法式西餐，卻又善用多種亞洲材料，「我都用好多日本牛肉、海鮮，又成日去街市睇吓有咩啱」，不久前有客人自攜龍躉，「咁啱喺街市買咗啲陳皮，落埋啲龍蝦汁去煮，估唔到咁夾」，烹調時從來不拘一格。她選材時亦會配合季節天氣，餐廳只供應同一款餐單，「比較容易控制味道，又唔會造成浪費」。
在男性主導的行業中，作為女性廚師，Vicky指未遇到任何歧視的情況，面對女性先天的不足自有應對之道，「好似一大煲湯，你一次搬唔到咪分兩次囉，一樣可以解決問題」，在自己餐廳中亦會聘用較多女性，「𠵱家男女比例係四比六，女仔始終都係細心啲」。
獲得「女廚神」殊榮，Vicky認同是對自己努力的一種肯定，但更重要的是可以認識更多世界各地不同的廚師，尋求合作的機會。她指現時餐廳主要做本地客人的生日、周年慶祝為主，希望未來可吸引更多遊客。
菜式按季更換
年前因慕米芝蓮一星食肆之名前往試食，食評家Herbert認為Vicky值得獲獎，「喺一個咁細嘅小店，冇大酒店餐廳咁多嘅資源，但做出嚟一啲都唔比人差」。他指當時是聖誕節，自己與太太順道慶祝結婚周年，店內裝飾恰到好處有情調，菜式亦充滿創意，配合不同顏色的碟子，「細緻度比好多二、三星都要好」，唯一不足是空間較窄，「差啲就掂到隔籬枱」。
Tate Dining Room & Bar位於中環蘇豪區，設有26個座位，主要提供混合的法式及亞洲菜式。菜式按季節更換，客人只可選擇要六道或八道菜，價錢由980至1,280元，酒水另計。
劉韻棋（Vicky）檔案
學 歷
• 紐約大學修讀平面設計
• 曼谷巴黎藍帶廚藝學院修讀Grand Diplôme
曾經及現任職餐廳
• Liberty Exchange Kitchen and Bar
• 米芝蓮星級餐廳Cépage
• 2012年創立Tate Dining Room & Bar
特色菜式
• 陳皮鱸魚
• WRETH（蠔及牛舌片）
• 日本鹿兒島黑毛牛肉
• 禪園（法式甜點拼盤）