香港有超人，美國有股神。投資者最留意超人李嘉誠與股神畢菲特嘅投資取向，想知佢哋嘅投資心法，舊年底又有關於股神嘅新書，裏面話股神成功有九大特點，包括一分一毫都要計清楚！
新書叫《Berkshire beyond Buffett》，作者Lawrence A.Cunningham曾經出版股神粉絲必讀嘅《The Essays of Warren Buffett》。
新書講股神點樣管理、投資同埋傳承問題，裏面提到股神有九大管理心得，包括小數目都要計清楚、覆行承諾、保持良好信譽、自動自覺、下放權力、要識嘢、有大家庭環境同睇長線。
股神向來都係長線投資者，上述特點大部份都係阿媽係女人之類，唯一比較有趣就係一分一毫都要計清楚。都說越有錢嘅人，越重視每一分錢，股神確係出名知慳識儉，成日都食漢堡包、飲可口，你幾時見佢話飲紅酒吖！