「長和」今次真係要鬧雙胞胎嘞！超人李嘉誠出手搞重組，計劃將長實（001）同和黃（013）化身成為長和與長地兩隻股份。那邊廂，其實一早有公司以「長和」名義喺香港掛牌㗎喇。
有東莞首富之稱、廣東黃河集團董事長鄭強輝，早喺兩年前已經將旗下公司中國東方實業，改名做長和國際實業（009），行前超人幾步。
呢隻九號仔長和，前身係黃百鳴揸旗嘅東方娛樂，主打電影製作同埋內地房地產兩瓣業務，公司覺得舊名只令人聯想到電影業，所以索性改名做長和，有大食大。
舊年深圳創業板有隻叫「騰信」嘅新股，挾着同科網股王騰訊（700）同名嘅氣勢，9月掛牌後，兩個月爆升五倍，最高見179元人仔，做埋全中國最貴價股，風頭一時無兩，之後由高位跌逾四成就係後話。今次長和重組整間長和出來，唔知九號仔長和有冇運行呢？