新世界發展（017）主席鄭家純（純官）最近透過家族企業周大福，入股本地老牌建築商新昌營造（404），奇就奇在，新世界旗下新創建（659）本身有協興同埋新世界建築兩間建築公司，入股新昌有乜後着呢？
消息人士就叫大家唔好諗多咗，指周大福純粹睇好新昌，想做被動投資者㗎咋，唔會參與公司管理。咁大家即管信住先喇。
新昌營造舊年底供股集資，聯交所本月初資料就披露，周大福拎4億元，喺場外買入4億股，估計係參與咗新昌嘅供股活動。有鄭家「御用經紀」之稱嘅鼎珮投資亦有落場，增持3億股，最新持有4億股。周大褔同鼎珮投資一共揸住新昌營造約14%股權。
𠵱家啲發展商成日用建築成本高企做理由，解釋點解樓價好難跌得落去，唔通建築公司真係大把世界？搞到已經有兩間建築公司嘅鄭氏家族，要入股多一間去擴大市場佔有率，搵多啲。