中證監2月9日開閘，畀人玩股票期權，由於冇10%升幅限制，又可以T+0操作，即日買賣，肯定有大把股民入場玩。不過好彩，阿爺都知道內地股民賭性重，限制只有50萬元資本以上的專業投資者先買得，對象亦只限上證50ETF期權，以免好似以前窩輪咁，成個市場玩爆咗，最終悲劇收場。
唔講唔知，內地曾經存在過窩輪市場，上面叫權證，規模仲一度勁過香港。但由於實在炒到太癲，最終俾阿爺叫停，最後一隻權證喺2011年8月KO咗。內地權證數目少，由2005至2011年，總共只發55隻權證，但成交量驚人。2006年上半年，成交金額達高達9,000億元人民幣，遠超香港。
最誇張係，呢啲權證到咗後期，通常成為極度價外末日輪，淪為廢紙，反而越炒越旺。例如喺2007年6月22日，係鉀肥認沽權證最後一個交易日，行使價15元，當時正股為30元。喺6月初，該認沽權證已經毫無價值情況下，仲連續多日成交超過百億元，日日大上大落，最多一日升7倍。喺最後一日，肯定已經成為廢紙，當日成交竟然都有12億元，唔少散戶損失慘重，成為最終叫停窩輪導火線。
李可強