上周先有深港通醞釀及發酵，後有長和系重組消息，港股甚有進入大時代的味道，股市似要上演一場大型財富轉移的劇目。我對深港通的看法較為簡單，雖然現時已有總理李克強的祝福，以及港交所（388）行政總裁李小加的配合，但若要開通深港通，就必先向市場發放滬港通的正面訊息，令其出師有名。因此未來數月，應有來自滬港通相關的利好消息，例如內地多隻基金只可買A股的條文已獲批放寬，可直接透過港股通來港買股，令它們的投資組合可有更多選擇，部份資金亦隨即來港，這亦可能是上周港股轉強的主要原因。
長和+滬港通 啟動升空模式
長實（001）上周五收市後公佈，與和黃（013）合併重組及分拆，完成後「長和」收歸所有非房地產業務，另一間「長地」則主攻房地產業務。有說現時和黃股價低水，資產折讓較深，所以李氏家族明益他們直接持股的長實。
而我認為，李嘉誠絕不會貪資產折讓咁簡單。投資界經常有人讚長實及和黃的業務之間互補是天才級的設計，因為開發房地產需要大量資金周轉，從投地至賣樓收款，大部份項目周期五年、十年以上，而其他業務如零售及能源等，都是能長期產生穩定現金流，各類型業務的互補不足之下，令其財務資源運用達到極致的級別。華潤系四年多前亦有意抄襲此模式，由從事收款快、找數慢的零售旗艦華潤創業（291）借出資金，供給系內幾家資金較吃緊的上市公司運用，當中包括地產旗艦華潤置地（1109），但最後因涉及太多間上市公司的小股東利益，未能成事。今次超人反其道而行放棄天才設計，可能與房地產再唔係佢眼中搖錢樹有關，分清及遷冊反而有利其海外收購，根據往績，超人眼光係第一流，今次長和系重組更遇上滬港通要發力之時，港股有機會進入大龍鳳升空模式，有冇貨長線都一定要跟進！
賣個廣告，我近日開班講點樣輕易運用新科技新思維炒股，估唔到咁受歡迎，可能因為大家知道這個大時代來臨的機遇，有興趣的朋友，不妨到facebook搜索「張士佳」，就可知道詳情。
當然有人會問，炒股靠雙手便足夠，點解要用科技？又以超人為例，佢被公認為投資眼光奇準，而近年就見佢馬不停蹄投資科技項目，由人造蛋、節能燈泡到「科技夾子．營」，可想而知，創新科技係未來大趨勢，事實上香港在這一瓣係明顯大落後。別的唔講，就以金融個人投資嚟講，今時今日坊間用的分析工具十年八年都係一樣，鮮有運用科技協助，而家就算叫貨van都科技大躍進啦，更何況同我哋荷包更有關的金融投資，就應該更加要進步。唔少人又以為科技好難，連瞭解都怕怕，這就是錯覺，其實世界上好多產品的設計係複雜，但運用可以極簡單，情況就好似大家每日用的智能電話一樣，設計係好複雜，運用就好方便。其實成功有時可以好簡單，邊個快人少少向前行一步，邊個就贏，誠哥咪就係快人一步的表表者。
張士佳