阿里巴巴創辦人馬雲似乎唔可以離開鎂光燈，佢唔係爆出金句、批評對手引起小風波，就係公司有新發展動向，總之一定引到大家關注。新近市場就傳出阿里計劃發展到去印度，打算拎45億港元買入「印度淘寶」One97大約三成股權。阿里𠵱家市值近2萬億元，呢筆數簡直濕碎。
雖然印度網購市場未算成熟，不過One97旗下購物同支付平台Paytm就話，至今網站已經有1.5萬個商家進駐，仲有2,500萬名註冊用戶，使用公司支付軟件嘅，都有2,000萬人。阿里出錢入股，應該係睇中對方喺印度有一定知名度，有助擴展當地業務。
阿里巴巴不停大叫「芝麻開門」，舊年開咗美國融資市場大門，水喉充足，想去邊度開門都得啦。