新一季嘅網球球季啱啱先開始，瑞士天王費達拿就即刻上力，噚日喺布里斯班網賽嘅男單決賽有驚無險下以2:1贏波，唔單止捧起個人今季第1個冠軍獎盃，更加累積自己職業生涯嘅第1,000場勝仗，終於可以加入之前只係得干納斯同蘭度兩位尊貴會員嘅ATP 1,000勝俱樂部（見附表）。
費天王已經30有3，近兩年風頭仲好似俾拿度同迪祖高域蓋過晒，目前嘅世界排名亦只係得第2。前無去路，後面亦都有追兵；包括華奧歷、狄美托夫等等嘅90後新星來勢洶洶，但佢喺新球季嘅第1個正式比賽，就展示出佢嘅天王級實力，一班後起之秀都仲未挑戰到佢嘅地位住。
苦勝華奧歷 講感受眼濕濕
以頭號種籽身份出戰布里斯班網賽嘅費天王，4強輕鬆淘汰23歲嘅保加利亞後起之秀狄美托夫，入到男單決賽嘅對手，就係3號種籽、世界排名低佢6位嘅24歲加拿大新星華奧歷。賽前累積999勝嘅費天王，噚日着住紅色波衫同波鞋力爭第1,000場ATP勝仗，果然鴻運當頭，用咗31分鐘就以6:4先贏第1盤；但係華奧歷呢位身高1米96嘅重炮手，不斷開出一球又一球Ace，第2盤就贏咗tie break追平。不過，費天王到咗決勝盤險勝6:4，苦戰兩個鐘頭13分鐘後終於達成個人里程碑。
費天王賽後眼濕濕，好似想喊咁，發表得獎感言時勁催淚咁話：「我永遠都唔會忘記今場波」，喺觀眾席支持嘅太太米爾嘉同對孖女都睇到好感動。心情超靚嘅費天王又大讚今場對手華奧歷打得好，有大把前途，祝佢未來都可以join埋個1,000勝俱樂部，仲講笑咁話，希望對方到咗33歲都仲行得走得。
「弗」爆迎下周一澳網
雖然球季啱啱先開始，大家都應該未熱夠身，但已經睇到費天王嘅狀態大勇，佢老人家要連續4日落場都冇問題，最終順利贏波封王響頭炮，果然有心有力。新球季一開閘就應聲彈出，下個星期一開打嘅澳洲網球公開賽，真係絕對唔可以睇小佢。
識睇，一定係睇足英台【英波Live】：
http://soccer.appledaily.com
http://bit.ly/engballlive