喺大台做咗十年無名小卒、今年30歲嘅陳堃（Oscar），12年過檔港視接拍《來生不做香港人》，由鍵盤戰士化身成無頭騎士成功彈出，最近獲金牌監製鄧特希賞識，邀拍廣東電視台新劇《只有情永在》（暫名），同黃芷晴拍檔首嚐做男主角滋味。
陳堃日前喺灣仔受訪，佢話終於等到機會：「以前通常演邊個細佬、邊個嗰仔。」Oscar同好多奀星一樣捱過窮：「以前人工係咁上下，試過畀女友投訴叫轉行。我習慣畀晒份糧屋企人只攞零用錢，所以櫃員機撳唔到錢係常事，月尾幾日梗要問番阿媽。」鄧特希讚Oscar外形討好，有前途。
丹丹跳樓靠害
《來生》今周進入結局篇，陳堃同民主女神王歌慧有一場激烈床戲，歌慧話：「第一次拍都幾尷尬，淨係披毛巾。」陳丹丹最後跳樓身亡，臨死前還陷害張可頤坐監，有網民話涉抄《法證先鋒III》，因為咁啱都係丹丹跳；而劇中患子宮頸癌嘅劉美君就堅持保住胎兒。
撰文：馮仁昭
採訪：嵐山
場地：嵐喬日本料理
髮型：Sunny Yu@Hair Culture（王歌慧）