自稱阿爾蓋達組織嘅恐怖分子屠殺巴黎記者，引起西方國家大震動，法德英美領導人同指屠殺恐怖無血性。屠殺事件在星期三（一月七日）發生，之前一日，德國幾個大城市有撐移民、反移民示威，前屬東德嘅德累斯頓有萬人上街反新移民，原西德城市科隆、柏林就有人支持新移民，形成兩派。總理默克爾夫人來自東德，身為一國領袖，自不然係呼籲各方包容，不要撕裂社會。西歐國家社會為移民而分裂，並不稀奇，香港都有本土派強烈排擠強國人啦，但香港新移民畢竟與居民係同文同種，佢地融入本港，只需兩三年時間，西歐移民囉喎，大多數來自北非、中東，移民與歐洲本土人膚色不同，語言不同，宗教不同，生活習俗完全不一樣，要完全或90%融合，實不知等到何年何日。
經濟上，西歐之需要移民，主要原因係在經濟好景年代（1970至2000），西歐缺乏基層勞工（如清潔工、地盤工、餐廳侍應、水喉佬等等），因利乘便，放寬移民，以紓解勞工短決，於是逐漸形成兩個上下不同階層嘅社會，白人（歐洲人）在上，有色人種（新移民）在下嘅情況，為社會階層分裂埋下種子，到最近十年，歐洲經濟不景，失業率高過10%，年青人失業率在20%至50%之間，高到嚇死人，大家爭工作職位，更易產生磨擦，所以法國反移民派近兩年在地區選舉贏得勝利，令執政社會黨備受威脅。
今次巴黎恐襲，恐怕會更加擴大西歐反移民情緒，當權在朝政黨幾難以人權、自由、博愛、平等、包容呢啲觀念嚟說服本國選民容忍穆斯林新移民，奧朗德、默克爾隨時會輸掉大選下台。德法嘅社會民主政黨素來親近移民，包容穆斯林，但奧朗德依家點敢再大聲為穆斯林辯護？固然可以學習澳洲嘅（雪梨咖啡店發生伊朗人殺人質之後，澳洲人好文明咁話要分辨善惡，唔好歧視其他穆斯林），但澳洲情況唔同，地大人稀，資源豐富，不似西歐人民擠在城市與新移民朝見口晚見面。奧朗德嘅社會黨呢勻左右做人難，恐怕難免唔會隨波逐流要同新移民保持距離，令極右派（Le Pen一派）在未來選舉佔優勢，政治局勢變動會左右經濟政策，今年投資大方向實在難估。