港女們開心買鞋，唔開心又買鞋；球隊們贏波買人，輸波更要買人，其實大家都幾似。
阿仙奴港女：有錢但孤寒，作為朋友係相當不受歡迎嘅，好姊妹一齊出街，就係想一齊喊、一齊笑同一齊買到成手都係，但阿仙奴港女明明大把子彈，就係嫌三嫌四，唔格到最尾嗰間同埋賣剩最後一件，都唔會下定決心！做朋友麻麻，但係做老婆就係極品嘞！
曼城港女：曼城港女第一眼係睇唔出嘅，因為佢不求款式養眼，甚至專登唔要大大個logo。所以你未必知佢身上嗰件無牌子不知名嘅大衣，原來貴過你身上冇牌子嘅十倍，咁點解有差唔多嘅平嘢都要着咁貴呢？因為你所謂嘅貴，對佢嚟講，都係好平。
車路士港女：車路士港女係正常啲嘅有錢人，佢討厭平庸，搭火車明明大把位都要坐頭等，sorry，應該係用坐飛機做例子比較啱啲，明明crossover個款仲醜怪咗都要買。因為佢覺得多人搶嘅一定係好嘢，而佢知道喺鬥多錢嘅世界上，佢一定係贏家；佢可以唔要，但唔可以買唔到。買多咗，擺響人哋度先囉。
曼聯港女：條底褲緊要，定條面褲緊要？「邊樣俾人見到就係邊樣緊要囉。」佢會咁樣答你！其實又係喎，着靚嘢比自己睇定比人睇吖？佢鍾意充大頭，有前無後，唔打得都嚇得嘛，但通常呢啲咁嘅擺大個頭行為都係過度期，因為淨係着條面褲，入面涼浸浸其實唔係幾舒服，守唔住條底線好易冷親，慢慢佢就會知一條好嘅under好有安全感。
利記港女：「唔知點解啲好嘢都喺晒人哋度！」佢可以話好念舊，亦可以話係放唔低，「𠵱家呢件唔係唔好，但以前嗰件好好多囉！」平日好哋哋就乜事都無，但好可惜佢大部份嘅都係壞日子；當隻錶花咗、架車死火、個袋重咗，佢就會響起口頭禪。終有一日佢會好掛住現任，就係當現任變成另一位前度。
巴塞港女：食開大茶飯，出入在中環，做慣潮流雜誌封面人物，但有日突然乜卡都唔碌得，只准賣唔准買，可以行街但只可以window shopping，有得睇冇得掂呢種苦況，並唔係一般低下階層會明白，咁慘可以點？發晦氣囉，話之佢係國際足協嘅公子，都唔好睬佢，直到啲卡碌得番為止。
KEYMAN
節目主持