全靠「壽星仔」王大雷撲出12碼，加埋于海省中人嘅罰球入網，踢得麻麻嘅國足行運行到尾，以1:0險勝沙地阿拉伯，喺亞洲盃旗開得勝。
被編入B組嘅國足喺上周六出戰首場比賽，喺布里斯班對沙地。上半場雙方拉鋸，戰情幾悶，兩隊把握力都好差，係得國足嘅吳曦個人突破後射斜叫做似樣少少。至於俾人吹到係「中國美斯」嘅武磊就踢得好沉，隊長鄭智亦好似唔多夠體能，國足主要靠踢過史浩克04嘅蒿俊閔製造威脅。
就嚟再做爸爸旺上加旺
直到61分鐘，沙地前鋒夏沙斯半單刀闖入禁區，國足嘅任航落腳中人唔中波，累球隊輸12碼。夏沙斯親自操刀，但射得冇角度又冇力度，俾噚日26歲生日嘅門將王大雷用膝頭救出，幫國足幸保不失。賽後好多網民都讚大雷，又話靠晒佢福星高照，對手先射得咁差。大雷除咗係「壽星仔」之外，佢就嚟又做爸爸嘞，因為佢老婆陀緊第二胎就快生得，不過大雷自己話老婆千叮萬囑叫佢專心踢波，唔好掛住屋企。
梅方抽筋變「功臣」
睇住成場波，真係可以話國足得到幸運女神照住。喺79分鐘後衞梅方抽筋，我求大俠心諗唔係啩體能咁差嘅？結果搞到原本準備入替于海嘅中場劉彬彬冇得入嚟，國足焗住用姜至鵬入替梅方。嗰陣我大俠睇到擰晒頭，話晒劉彬彬係去季「中超新人王」，亦係國足嘅秘密武器，咁樣冇得入場，睇個勢都冇得贏啦！
點知「柳暗花明又一村」，好在冇換走于海咋。81分鐘，于海主射罰球，又好好運咁省中對手，改變方向入網。有啲網民賽後都講笑話梅方係全場最佳，因為佢抽筋抽得合時喎！最後，全場得3次中目標埋門嘅國足，就以1:0打開小組賽勝利之門，仲係18年嚟首次贏到沙地。
另外，有樣嘢好巧合，噚日3場亞洲盃比賽都係踢成1:0。其中同國足同組嘅烏茲別克贏北韓1:0，國足下場就會鬥烏軍；至於A組嘅南韓就贏阿曼1:0。
識睇，一定係睇足英台【英波Live】：
http://soccer.appledaily.com
http://bit.ly/engballlive