落飛黨呢日一直冇乜行情，頭五場冇一隻win佢哋有份中，第六場四班千六米卻來個大轉向，全場四匹落飛馬，其中三隻入三甲，頭三名順序係「拼搏小子」、「匯聚力量」同「甜城效應」，只「勁福星」落飛冇料到；而擂台躉「贏男」被隊冧，大熱跑梗頸四，不過三T正獎都有人中，每注派107萬，反為安慰獎卻派三百蚊唔夠，奀過奀豬！
「拼搏小子」、「匯聚力量」同「贏男」直路末段一字排開鬥衝，前駒在李寶利胯下力壓「匯聚力量」7.5倍打開今季勝門，「匯聚力量」衝足大半條直路都係第二，25倍綠燈Win開唔到，但位置卻著啡燈只得4.7倍，李易達連同第五場「駕善」，呢日已經兩度做阿二。至於「贏男」贏完馬加分加磅，換上從未騎過之韋達，衝咗百幾米就腳軟，仲要畀「甜城效應」過埋僅得殿軍。
「拼搏小子」練馬師呂健威說：「『拼搏小子』不是大隻仔，體重只有985磅，之前多次負130磅或以上，對牠來說有點難度，今仗128磅還可以。李寶利對馬兒的性能熟悉，此馬衝刺力短，需要慳力爆一段，李寶利今仗掌握得很好，值得一讚。」