第四場上演香港賽馬會130週年紀念盃，賽果極之正路，皆因大熱門2.3倍之「英勇大師」於韋達胯下話贏就贏，以輕鬆姿態一鞭都唔使開，就順利收復上仗之失，反勝「共創美好」報番一箭之仇，人馬合作7次繼續非勝即位。
今場二班1200米由現役最具代表性騎練同馬主攜手奪冠，韋達係13屆香港冠軍騎師，告東尼則係首位由馬會培訓出來之騎練雙料冠軍級人馬，至於馬主施雅治夫婦養過17連捷馬王「精英大師」，由呢個星級組合捧走香港賽馬會130週年紀念盃，可謂應景不過。今場二至四名分別係「天時駿駒」、「共創美好」同「仁仁友福」。
賽後梁振英頒獎，佢一落草地行去頒獎台途中，即時傳來陣陣噓聲，更有物件從公眾席向外拋出，但冇掟中梁特。頒獎期間亦有蝦碌鏡頭，馬會主席葉錫安一拎起銀色獎盃，獎盃底座居然甩開，佢將錯就錯，將隻甩底獎盃交畀梁振英，再頒畀馬主施雅治太太費葆奇。
施雅治說：「我和太太很開心，『精英大師』的綵衣能夠在馬會130週年大日子贏馬入凱旋門，再與好拍檔告東尼一起贏馬，特別意義。『英勇大師』今仗贏得輕鬆，牠未必達級際賽水平，但可以上一班；韋達賽前承認上次犯錯，此駒上仗在韋達胯下跑第二，他說跑錯了，錯在出頭太早，末段埋唔到尾，今次賽前他說絕不容許自己再犯同樣的錯，結果韋達說得出，做得到，人馬跑出漂亮的一仗。」