上期講過交此體育版稿充滿不穩定性，因為經常喺截稿前一日有突發，就呢個禮拜，小弟已經磨定墨準備悼林保全先生，與其演繹之《足球小將》嘅林源三（原版若林源三），殊不知再有一位林先生過身，世事難料，2015年頭真係日日有眼淚。
先講林保全先生：叮噹（係呀我認我老，死唔講A夢）喺過去一個禮拜經已攻陷老中青少嘅FB同討論區，但同時亦勾起我對《足球小將》林源三嘅回憶。80年代我等小學雞，當《430穿梭機》（唉，同悼）首播呢套卡通時，係幾咁震撼！全校都一齊討論，小息開始有人踢任何碌得到嘅嘢，然後個個男仔都想買足球。之後嘅日子，踢波就爭住做戴志偉，做龍門就一定林源三上身。至於泰萊、健威同小志强，通常猜輸咗至會考慮，小組次名熱門也。
至於完美守門員林源三經常出現嘅對白，就係受傷。以劇本計，一個唔失波嘅龍門唯一可以表現佢鬥志嘅，就係拗柴爆骨頭撼柱都要擋番個波出嚟。林保全先生把聲，就有將呢類肌肉嘅痛楚表現出嚟，所以大家至會對南葛隊被狂攻時咁肉緊。
另一位要悼念之林生，乃暗黑足球小將一名，皆因佢從來未見過波：香港盲人足球隊嘅林榮順先生也（圖）。此君替港隊攻入歷史上首球，惜年少戰歿於漆黑球場，哀哉。勉諸君，眼看不到，不等於要放棄追逐，明目香港人請銘記。
梁栢堅
填詞人+彩池人