亞洲盃經已開始咗，今日先同大家推介沙地阿拉伯對中國場波。中國隊最近有一番新氣象，就係由佩連（紅衫）執教，呢位法國教練重用新人，香港球迷熟識嘅武磊就係其中一位。喺戰術方面亦有多重準備，主張球員可試多個位置，但新兵遇上沙地，可能會有啲輸蝕呀。
始終沙地都係西亞傳統勁旅，而踢當地球隊艾希拉嘅中場阿爾艾拔就一定唔可以睇少，國家隊遇到佢哋，我睇都幾難有運行。
另外今晚葡超波圖對比蘭倫斯，鍾意「半場細」，葡超波圖一向以重火力見稱，就算出到歐洲都一樣照攻，強隊都冇有怕。不過波圖喺本土賽作風好似又有啲唔同，以穩陣為先，留番下半場先攻爆佢，所以波圖主場「半場細」嘅機會高到75%㗎，兩場乘埋有3.6倍，又可以諗吓佢喇。
上星期去睇省港盃第二回合，見到𡃁仔威俾人踢到斷腳，事後球圈都討論到踢球會以外比賽嘅保障問題。噚日我見到幾個新一代港隊球星喺旺角茶座議論紛紛，我就梗係走埋去八卦吓啦，但我都未開聲，MK仔就即刻同我講：「領隊幫吓手得唔得？」我話咩事？MK仔話：「我哋班踢波仔冇個有墨水，幫我哋寫封聯署公開信畀足總，內容係如果再唔講明踢『太公波』有咩保障，以後就唔好選我哋！」我話：「你哋唔叫我都會寫，放心！」希望足總啲負責人好好哋正視呢個問題，唔係就手尾長囉。
本地職業領隊
耳聽八方 專收好料
識睇，一定係睇足英台【英波Live】：
http://soccer.appledaily.com
http://bit.ly/engballlive