黃百鳴旗下的天馬影視(1326)，剛剛由創業板轉往主板上市，早幾天佢哋為電影公司舉行周年晚宴，黃百鳴嘅老友、「電訊」系馬主張敬山亦有出席，雖然張敬山係上咗年紀嘅麻甩佬一名，但佢為人一啲都唔古板，仲好似啲港女咁，喺晚宴度大玩selfie（自拍），同啲明星老友集郵，包括古天樂、林峯、溫碧霞、盧海鵬、林家棟、索女DaDa同漫畫家黃玉郎等。
古天樂同林峯自從2001年無綫劇集《尋秦記》後，好少再一齊拍戲，當晚張敬山笑笑口向黃百鳴建議，點解唔開套戲，邀請古天樂同林峯再度合作，票房一定大賣，張敬山仲話如果套戲真是開得成，希望黃百鳴可以畀個角色佢演！
記得冇耐前林峯同幟哥黃永幟入馬場，為老友嘅「大地王者」拉頭馬，當時林峯話對賽馬好有興趣，正申請做馬會會員，然後入紙申請養馬。張敬山表示以林峯嘅條件，相信唔使好耐就會實現，好期待林峯將來做馬主，大家一起入場交流養馬心得，有更多話題。至於將喺今期(10日)第二場上陣嘅「電訊太子」，上季三捷大豐收，雖然今季冇乜表現，但張敬山話愛駒今次明顯壯咗，體重升番上季贏馬水平，希望有好演出喎！