立法會啱啱喺星期三舉行嘅大會，絕大部份泛民因為撐傘離場抗議政改第二輪諮詢，議事廳幾乎清一色建制派，可能見繼續辯論嚟都冇乜火花，所以當日罕有地一日開完大會，翌日唔使續會，結果最開心嗰個，可能係自由黨田北俊，點解呢？
查實周四係田少正日生日，由於唔使開會，令佢當日優哉游哉，同一家人包括四個孫一齊開心慶祝68歲生日，佢話生日願望係香港和諧；至於有冇希望梁振英落台或攞返政協，佢就冇答。
同屋企人慶祝完，噚日田少返到立法會，其他四名自由黨議員都送上蛋糕同佢補祝生日。平時最愛寸梁振英嘅佢，今次將寸爆對象轉去民主黨何俊仁身上，佢話「過咗生日先同我慶祝，點都好過表決完先辭職」，擺明嘲諷鐵頭仁喺政改表決後先辭職公投，有用咩？