今次本欄推介嘅重心，有啲趕客feel，就係今季英超作客未攞過1分嘅昆士柏流浪。
昆士柏流浪，倫敦三流隊，冇乜人會有好感，不過細心睇，今季英超作客9戰全敗僅入4球，但暫時仲唔喺降班區域；明顯主場戰績好過唔少同級隊外，亦有一定戰力。睇番今季作客9敗中，有8戰係輸畀𠵱家排名前10嘅球隊（只係未對曼城同利記），剩番嗰場係敗走愛華頓；即係表示下半季，有大把機會好似今晚作客低3級、排尾2嘅般尼咁，喺同級球隊身上搶分。
昆士柏今晚會變番「夫添」，但客W都冷到3.4倍，「多得」上仗快車尾輪踢足總盃，大輪換下仍然腳軟，主場吞甲組錫菲聯3蛋。哈利列納老江湖，教昆士柏呢類中下型班，保命至緊要，上仗大敗唔使放到好大。相反，翻查對上兩季，哈叔領軍，昆軍喺足總盃第3同第4圈已出局，但翌仗分別聯賽贏葉士域治、同前季和曼城；賽前借到韋斯咸嘅攻中莫路沙拉迪，又睇吓幫唔幫到射手查理柯士甸（圖）繼續起「Q」。般尼無疑近況有起色，主場少敗，但今場缺少主力中堅沙基爾，今季兩次列讓球上盤全輸盤，唔理有冇收視，冷W同受讓平/半高水下盤，一併放入貼士表。
無鋒曼城必取沉態拖肥
鍾意捧強隊嘅，可取無鋒陣照樣咁勁嘅曼城。藍月亮嘅迪斯高同阿古路已復操，雖然冇埋踢非洲盃嘅耶耶，但撞啱主隊愛華頓極沉；筆者留意到下個月滿34歲嘅防中重將巴利，自從11月頭鬥新特蘭早段重創被抬出場後，之後復出踢足7場聯賽，拖肥卻錄得1和6負劣績，未踢番之前水準。仲有前線「新魔獸」盧卡古，俾前波士摩佬批中，心理質素差，大賽或鬥強隊通常失靈，今季鬥Big 6未入過波。藍月亮作客讓半/一照博上盤。
仲有俾藍月亮追到氣咳嘅車仔，今晚主場鬥超殘陣兼繼續無帥嘅紐卡素開到「-2」，驚季尾計得失球爭標，呢場波唔好放過大炒，攻大勝波膽！
波神
神級攻略 智破足彩
識睇，一定係睇足英台【英波Live】：
http://soccer.appledaily.com
http://bit.ly/engballlive