成日執到正嘅商務及經濟發展局局長蘇錦樑Greg，買呔原來好少假手於人，通常都係自己去揀，就連太太見到心水想幫佢買啦，通常都要影相WhatsApp畀佢睇吓，覺得滿意先可選購，係咪好有要求呢？
而阿Greg周四晚喺廠商會新會長就職禮上，一見新民黨副主席田北辰就雞啄唔斷，原來阿Greg打緊嗰條棗紅色呔，係喺二少間舖頭G2000買㗎，趁減價時買，先至200蚊三條，所以專程同田老闆大讚好抵，二少當然賣呔讚呔香，豎起手指讚識貨啦。
阿Greg話佢買呔唔係着重價錢，重視款式更多，佢數唔清屋企有幾多呔喇，若然有啲呔個款舊咗，佢就會轉贈唔係太講究款式嘅朋友。佢話一般唔喜歡太花，但顏色則傾向「多元化」，以配合唔同塲合需要，例如出席立法會會議，就偏向保守一啲。