是咁的，《100毛》今期出咗個紀念保全叔嘅紀念集，毛孩仲用咗叮噹或者後現代新名「多啦A夢」背向讀者揮手講Bye Bye嘅封面，回憶叮噹配音員林保全，但嗰個咁藍咁溫情嘅封面，卻惹來版權爭議。
持有多啦A夢版權嘅國際影業，聽聞已經寄咗信畀毛孩，話有機會涉及侵權喎；咁八方又問吓毛孩林日曦，佢話如果人哋出咗律師信，就唔好評論啦，睇吓對方講乜嘢先。
寫信畀叮噹懷念美好
八方亦向國際影業查詢，公關姐姐只係話，件事交咗畀版權部跟進緊，暫時都係唔講咁多住喎，似乎有啲嘢咁噃。如果最初係由林日曦粉墨登場扮登場做封面，唔知會唔會惹起爭議呢？而原來大家睇開嘅蠟筆小新、小丸子、Panda Z同PostPet等卡通人物，版權都係國際影業持有㗎。
八方都睇過今期《100毛》，發現內文有毛孩寫信畀叮噹，「保全叔的離去，除了讓我們感到惋惜和難過，也令我們重新想起並加倍懷念你，和你所代表的簡單、善良、真誠、忠心，這些美好的價值，在我長大後的成人世界都不多見了」，仲問叮噹會唔會出席保全叔嘅喪禮，如果會嘅話，到時再傾，相信呢個都係好多叮噹迷嘅夢想。
李八方
mailto:[email protected]