自拍神器喺香港社會熱爆，估唔到立法會議員都自創「㩒掣神棍」，以便喺拉布已經成為立法會家常便飯之時，輕輕鬆鬆㩒掣去。
查實八方係喺噚日立法會內務委員會會議上，發現如此「驚世」發現。只見民建聯黃定光不停用支棍喺席間不停篤，原來係示範如何唔郁之下，挨住椅背就㩒到表決掣。而佢呢支「㩒掣神棍」，製作相當簡單，用將兩支木筷子黏住頭尾就得，當然，對筷子梗係未用過會衞生啲。佢嘅黨友、漁農界何俊賢擔心佢篤錯掣，猛咁同另一黨友陳恒鑌教黃定光將神棍末端用膠紙貼喺反對按扭，咁就唔驚手震篤錯掣。吳亮星則搭嘴抽水話喎：「反對派有政棍，你（黃）有神棍。」