估唔到連熊貓都要搞中港「融合」。海洋公園前晚發出新聞稿，話園方稍後會同四川省林業廳簽署備忘錄，一齊推動四川動物及環境保育，而05年出生於四川卧龍、07年來港作為回歸10周年賀禮嘅大熊貓盈盈、樂樂，雖然居港七年變身新香港貓，但為咗培育下一代，都會首次加入全國大熊貓繁殖計劃，園方話希望增加大熊貓族群嘅數量同可持續性。
目前全球圈養嘅大熊貓約有逾300隻，卧龍有190隻。現年9歲嘅盈盈，其實之前N次同樂樂喺海洋公園內熊貓館交配，仲多次「假懷孕」，可惜興奮完都係食白果，但睇番台灣嘅團團同圓圓，2013年就誕下BB。咁又難怪海洋公園咁心急將盈盈樂樂加入呢個計劃，八方都祝願早日造貓成功。