花生友做人做咗Ｎ咁多十年（始終年齡都係秘密嚟嘅，無謂張揚啦！），講到邊個係人、邊個係鬼，都唔敢好大膽咁話，一眼就睇得出，但有時有啲行動卻可以反映，到底邊啲係人、邊啲係鬼囉，當然有啲人，仲係人鬼兩不分㖭。一場佔領運動，就見到呢個情況啦！
佔領鬧哄哄之時，好多「鬼」怪論，呢種鬼唔係長髮紅衣飄吓飄吓嗰種呀，而係日日留守佔領區，表面好正義，實質卻搞好多小動作，令個運動唔團結，有意搞破壞嗰啲「鬼」呀！花生友舊事重提，無非因為政圈近熱論緊，既然𠵱家事過境遷，係時候捉吓啲佔領區鬼怪，以免大家日後俾人呃到！
往來中港暢通無阻
花生友聽聞，泛民主派最近講緊一名「地主」，好似好勇武勁有吉士，一直堅持唔肯撤，本來呢份爭民主好意係好好嘅，之但係呢，當佔領運動結束，陸陸續續有啲佔區普通市民因為參加過佔領運動而內地拒絕入境之時，吖，唔知點解，呢位「地主」往來中港依舊暢通無阻，為乜冇被內地禁止入境？好多泛民主派都話，有啲嘢，不言而喻，唔使佢哋畫公仔畫出腸嘛?!!!
花生友一度叫佢哋唔好咁多疑，點知佢哋大返花生友：喂，如果係普通人，點會有咁多錢支持新人參選區議會？據聞仲講明唔會同泛民協調，言下之意即係會對決。係咪人鬼兩不分？佢話大家心中有數啦！
花生友