日本組合假面女子火速冒起，最近憑住單曲《元氣種》登上銷量榜冠軍，首周勁賣13萬張，令呢隊蒙面女團忽然上位，前日喺東京開騷，連過氣男團光GENJI主將諸星和己都一於靠黐，希望沾佢哋嘅人氣爭取見報。
假面女子由三組秋葉原組合Steam Girls、Alice十番、Armor Girls集合而成，成員各自戴上面具，再配花呢碌武器表演，仲標榜隊員個個都窮到燶，搞到班宅男好似太平紳士上身咁，上年開始瞓身支持，希望捧到假面女子成為主流偶像。
不過Steam Girls嘅17歲成員月宮可憐，上年夏天驚爆死訊，當時引起唔少揣測，點知近日就有4個新舊成員向傳媒爆料，指證事務所社長池田正流強迫成員性交，有少女仲要陪其他老細上床㖭！其實37歲嘅池田正流係做鴨出身，佢雖然已否認以上指控，但假面女子原本噚日上節目，最後電視台就因呢宗醜聞而臨時變陣。
撰文：李村姑