西王特鋼（1266）由11月1.55元，一嘢插到上個月中1蚊邊位，現價同集團啱啱建議配股畀中科院金屬所嘅入股價，又差無幾，在特鋼股中，西王特鋼殘到不得了。
西王特鋼兼係山東省領導性鋼材企業，最新上半年盈利就增長咗近12%到2億元人仔。食住山東省城鎮化大型基建開波，集團喺地區收入貢獻增加到75%（2013年同期64%）。又已講過，山東省由上年到2020年，108個重點城鎮化基建項目，總投資額2,060億元人仔，西王特鋼有地利，已經坐定粒六兼有得炒盈喜。
炒軍工概念肥仔水
好保守計，集團就快派嘅2014年度成績單，盈利keep住增長12%咁大把，上到4.3億元人仔，預測PE得4倍幾。場內特鋼股，撫順特鋼預測PE講緊400倍、南京特鋼54倍、大冶特鋼15.9倍。西王特鋼就算比起大冶，都大幅折讓過70%！
又上年尾，西王特鋼公佈同中科院金屬所，訂立戰略性框架協議，合作開發高端特鋼。最新消息係，中科院金屬所已經同意西王特鋼使用技術，西王特鋼以配售1億股支付使用權，每股1.22元，西王特鋼現價（1.24元）唔係差好遠。
又高端特鋼納入為祖國七大戰略新興工業之一，適用喺軍工、航天同核電等等高質產業。西王特鋼單係食住呢幾瓣產業帶嚟龐大需求，亦都肥仔水。而上邊特鋼股，炒軍工concept，炒到甩轆，西王特鋼升咗18%咁大把。再講，西王特鋼大股東又揸到75%爆燈水位，街貨得6億元，資金一發掘到，落場掃，點會唔甩轆？買西王特鋼，當追番上邊撫順一年翻一番升幅，都要見2.5元，目標價嘅預測PE，都係得9倍幾，邊有耐追到行家嘅PE水位？
錢雋
細價股專家
本欄逢周二、三、五刊出