特首梁振英口中所講嘅「外部勢力」，又有行動喇！英國國會就《中英聯合聲明》簽署三十年展開聽證會，調查《聲明》落實情況；早排聽證會已經請咗末代港督彭定康、《南華早報》前老總范力行（Jonathan Fenby）出席，近日出咗一張新名單，公佈下周二聽證會嘅證人，座上客原來包括英國外相「副手」、外交部國務大臣施維爾（Hugo Swire）。施維爾喺2013年公開表態撐香港真普選，仲話英政府準備隨時提供支援，雖然至今都未見有乜嘢幫助，但早排中國政府表明唔俾今次調查《聲明》嘅國會議員入境香港時，施維爾都有鬧北京完全不合理，講明英國有道義責任履行條約。唔知下星期，佢會唔會繼續開拖？