人怕出名豬怕肥，一旦出咗名，就會有無窮無盡嘅煩惱㗎嘞！八方講嘅，當然唔係八方本人啦，而係民望不俗、成日被人認定係特首黑馬之一嘅中大校長沈祖堯。事關之前已經俾人冒名寫文嘅祖堯BB，近日再次中招，原來有人冒認沈祖堯之名，透過WhatsApp發出一篇「沈祖堯醫生埋在內心深處的一份文章」，內容係叫人活在當下、珍惜身邊人等人生態度。文章末段仲話叫收到文章嘅人，不斷轉發嘅話，就會帶來好運。
乜祖堯BB好想分享佢嘅心聲咩？八方就此問中大發言人，中大傳訊及公共關係處急急發新聞稿澄清，話沈祖堯證實咗，佢從冇發表過有關言論，呼籲各界明察，勿再誤傳，仲對有人以沈校長名義發出虛假訊息，表示遺憾，希望發放呢啲虛假訊息嘅人停止有關行為喎。