做得記者，通常都係牙尖嘴利，好多名人都話記者難纏，但就算係年紀輕輕嘅小記者，都一樣唔易應付㗎！中電企業發展總裁莊偉茵（Quince）月前應香港信義會邀請，接受50位平均10歲嘅小記者訪問，據知Quince面對住一班精力旺盛嘅小記者，都要「格外留神」，大讚小記者口齒伶俐兼犀利。
原來當日嘅訪問題目係企業嘅社會責任，Quince分享咗自己七十年代仲係小學生那些年，適逢1974年廉署成立、積極建立社區關係，組織學校外訪計劃向學生推廣廉潔社會，當時Quince就參加計劃，成為廉署學生大使，佢話因此對以後做人嘅價值觀帶嚟深遠影響。因為咁，佢深信教育要由小做起，所以好like同小朋友交流分享，最希望可以將正確價值觀灌輸下一代喎。