富豪捐錢畀名牌大學唔手軟！繼恒隆地產（101）主席陳啟宗家族慈善基金舊年9月豪捐27億元畀美國哈佛公共衞生學院後，坐擁超過200億元身家嘅恒豐企業家族後人李德義，最近亦向母校美國麻省理工學院捐1.18億美元（9.2億港元），用作成立一所房地企業實驗室，希望大學設計一個切合21世紀發展實況嘅房地產研究項目。
75歲嘅李德義作風低調，家族企業恒豐喺香港、英國、瑞士等地持有大量物業，最廣為人知，係佢阿仔李建勤與媳婦曾昭穎嘅離婚案，媳婦要求54億元巨額贍養費，後來法院判佢可得4.1億元。
李德義今次捐錢畀麻省理工，主要係做房產研究，實驗室會探討社會責任問題，例如建築環境對自然環境嘅影響。住屋與居住環境係全球性問題，如果麻省理工真係可以研究出萬全之策，確係造福人群。