以前嘅官員好鍾意戴名錶，因為可算係身份象徵；但原來梁班子入面，卻有高官興戴手帶，用嚟襯衫或養生都得。日前先推出政改第二輪諮詢嘅政務司司長林鄭月娥（Carrie），呢期一定會為hard sell「袋住先」奔波勞碌，八方見佢噚日朝早出席電台節目時，一身套裝卻配以一隻至潮手帶Fitbit Flex，呢條手帶嘅功能包括記錄個人步行數量、距離、消耗卡路里等運動數據，仲可以記錄睡眠質素，估唔到佢咁有潮流觸覺。
可記錄睡眠質素
八方同事都算眼利，睇見林鄭右手手腕戴住一條手帶，就認出係「潮物」Fitbit Flex，售價約為港幣800蚊。查實Fitbit Flex自從2013年推出之後好受潮人追捧，除咗因為可以配搭智能電話等設備，以及管理個人作息，而且手帶內嘅記憶體可分拆，方便配搭唔同顏色手帶襯衫，簡直係女人恩物。
而呢條手帶仲內置五顆LED顯示燈，除咗提示同統計運動量，亦可以偵測同記錄睡眠質素，例如使用者係淺睡、抑或深睡呢？咁又係嘅，政改呢壇嘢咁難搞，點撬泛民四票？肯定令林鄭冇覺好瞓，要用Fitbit Flex幫手管理睡眠，都好合理。
唔知成日標榜自己戴膠錶以示好鬼平民化嘅特首梁振英，會唔會學吓林鄭潮戴手帶？相信喺咁嘅社會環境下，梁振英都需要管理睡眠質素啩？
李八方
mailto:[email protected]