為「叮噹」（呢個係我堅持嘅叫法）香港版本配音嘅資深配音員保全叔不幸早前仙逝，唔少有番咁上下年紀嘅香港人都同聲一哭；其實小弟成長階段，總覺得叮噹係畀女仔睇，自己實際唔係睇好多，相反保全叔另一套有份配音嘅《足球小將》就集集追，所以對小弟嚟講，冇得聽林源三比冇得聽叮噹，失落感更大。
誠如叮噹主題曲其中一句：「離奇神化不可思議，心中一想就得到。」日本漫畫冇限制嘅創作思維，對日本新一代影響都好深。好似《足球小將》，以當年日本足球水準充其量只係亞洲一線尾，不過高橋陽一都可以寫到，一班日本地區小學生，年紀細細已經立志幫日本足球衝出國家，衝出亞洲，你可以講日本人自大，但真係不得不佩服高橋先生嘅威力；前國腳中村俊輔（圖）都講過，自己細個立志做足球員，都係因為《足球小將》影響，《足球小將》其實已經影響咗日本一代人。
雖然距離拎世界盃呢個終極目標仲有漫漫長路，不過今時今日大半隊日本國家隊球員喺歐洲搵食，英超、德甲、意甲都有日本球員搵食，今屆亞洲盃都係大熱門，日本足球水準已經直迫歐洲二線水準。
曾經聽過一個戲言，如果一個運動項目有3個或以上運動員組成，中國隊多數都唔會成功，因為中國民族性已經注入內鬥嘅先天個性，群體運動又點會做得好。當日本人可以自由欣賞《叮噹》、《足球小將》，甚至《英雄本色》、《課長島耕作》等等衝擊權威嘅漫畫，但強國小朋友連睇卡通片，都逼住要睇一啲政治正確嘅《喜羊羊與灰太狼》，強國嘅下一代又點會有夢想。
文：牽牛