今年34歲、有「體育新聞王子」之稱嘅伍家謙，上年11月底喺無綫完成最後一次體育新聞報道後，已正式離開工作咗11年嘅工作崗位。之前伍家謙曾經講過離職後會作多方面嘗試，又喺fb留言話：「相信唔使幾耐，就會再碰頭。」原來佢將會踩入男模界，以超過六呎嘅高大身形，同圈中一眾型男爭飯食！
唔慣不停轉甫士
據知，伍家謙𠵱家其實係放緊大假，佢同無綫嘅合約下個星期先至滿，而約滿後第一個工作，就係下星期一（12日）嘅天梭錶活動，殺入男模界嘅伍家謙，第一個job就有機會同「準Jay嫂」昆凌同場。
日前馮仁昭就發現唔再着西裝，改穿便服加送chok樣嘅伍家謙喺旺角幫手錶品牌影硬照，雖然伍家謙以前成日都會用好生鬼嘅報道手法報體育新聞，但突然要喺鏡頭前不停轉甫士影相，呢位初級男模明顯未習慣，全程都表現得幾生硬，商場人來人往，有人認得佢都指指點點，佢就更加唔自然，不斷出現「天然呆」。
撰文：馮仁昭
