去年底各間券商發表2015年股市策略報告，內地媒體統計，幾乎間間唱好。八成券商睇滬綜指最少升至4000，而重點推薦板塊就係券商股，賣花讚花香。
咦？既然睇得咁好，但券商股又被大股東喺去年第四季勁減持，咁又點解釋？
券商股去年第四季爆升，平均升幅130%，大股東就不斷乘高掟貨。內地媒體報道，期間有15家券商被減持，涉及10.89億股，市值163億元（人民幣．下同）。
對比第三季，只有8間券商被大股東減持，減持股數僅為2.5億股，市值23億元。
去年升得咁勁，要做個故事令人相信今年仲有得再上，確係高難度動作。請睇其中一家券商，華泰證券嘅大作：「市場紅利、制度紅利、槓桿紅利，驅動行業進入黃金發展期，預計2015年行業盈利增長50%。」
華泰證券去年尾亦被大股東減持，如果真係咁理想，又唔見佢自己增持？
券商自吹自擂，掩飾大股東派貨，局外人自然容易睇穿。中信証券（6030）A股去年升幅達170%，但H股升幅只有37%，證明境外投資者似乎更理性，好難buy佢哋嘅故事。
李可強