費蘭度托利斯（費托）終於返去母會馬德里體育會，亦喺周三西班牙盃16強首回合賽事亮相，正選披甲。不過費托依然冇波入，但最緊要係贏到波，協助馬體會先拔頭籌喺主場以二比○擊敗皇家馬德里，更係佢歷來第一次披上馬體會波衫下擊敗皇馬。費托喺07年離開馬體會，之前曾經9次同皇馬交手，只得4和5負，加埋都只係入得1球。費托返嚟馬體會喺周三西盃首次上陣，教練施蒙尼早已事先張揚由佢擔任正選。
皇馬將膝部有嘅傷嘅基斯坦奴朗拿度（C朗）列為後備，但上半場依然有唔少攻勢，不過始終入唔到波。下半場13分鐘馬體會打破僵局，魯爾加西亞喺禁區被沙治奧拉莫斯攬跌，12碼由前者親自操刀建功。之後C朗入替都幫唔到手，仲喺76分鐘輸多球，守將荷西基文尼斯接應角球頂成二比○奠勝。主帥施蒙尼就開心死，兩次入波都同喺今場波客串做執波仔嘅囝囝古利安奴擁抱慶祝。
銀河艦隊新年連敗
皇馬喺上場聯賽輸畀華倫西亞，22連勝斷纜之後似乎有啲洩氣，2015年暫時兩戰全敗，好在下星期次回合仲可以返主場收復失地。而「挪威神童」馬田奧迪加特今仗亦係座上客，據講佢好快就會同皇馬簽約加盟。
費托呢場波冇波入，連一次正式射門都冇，但佢喺58分鐘被調離場之前都踢得幾搶韁，有5次犯規同3次越位（見附表），話晒返馬體會或者已經係佢嘅最後機會，𠵱家唔搏仲等幾時。費托喺賽後話：「今日係值得慶祝嘅日子，皇馬係世上最好嘅球隊之一，首回合贏二比○令我哋好有機會再晉一級。」
馬體會近排硬仗連場，喺嚟緊周日西甲會作客出戰巴塞隆拿，到下星期就再對皇馬踢西盃次回合。雖然費托暫時未可以取代文迪蘇傑嘅首席前鋒位置，但馬體會球迷對佢依然咁愛戴，只要有好表現，相信可以變番快樂嘅王子。
識睇，一定係睇足英台【英波Live】：
http://soccer.appledaily.com
http://bit.ly/engballlive