亞視拖糧遭員工鬧爆，投資者王征堅持已完成「歷史任務」，不肯揼水救亡，《亞洲星光大道》出身的梁景煌（Tommy）和有「班長」之稱的李明憲近日突然爆料指被王征騷擾。
Tommy向雜誌爆料指前年正月初五，被邀到王征深圳寓所聚會，他指當日還有亞姐齊真晨及亞洲先生徐丁等。由於Tommy渴望成為亞視合約藝員，故他希望親近王征達到目的，飯局後願留低過夜。Tommy自稱曾跟王征接吻，二人更大膽同床，他指被王征上下其手，還被揸下體。他很快獲得簽約，還被同事嘲笑做「老闆娘」。記者昨致電Tommy，他不願多談：「唔再講啦，我嗰日接受雜誌訪問係想申訴吓，呢次經驗當上咗一課。」查看Tommy的facebook，發現他貼出多張易服姣look和雙腿張開照片。
盛品儒口窒窒喊驚
李明憲昨在旺角接受訪問時，談到4年前簽約亞視，他說：「有次去完首映，藝員科話老細（王征）叫我哋去蘭桂坊唱K，王征坐咗埋嚟，佢突然伸手搭住我膊頭同掃吓，我即時詐諦行開點歌，之後王征再過嚟搭膊頭，有藝員望到叫走我解圍，我行開再擰轉頭就見到佢同個男藝人喺度咀，嗰刻認定約滿必走。」有指跟王征咀嘴的是亞洲先生黃文韜，已有女友的李明憲強調自己絕對正常，至於可知王征性向，他說：「我又唔知，但王征入咗嚟亞視搞到烏煙瘴氣。」就兩男指證，記者昨致電王征，電話一直沒人接聽。而已離巢亞姐顏子菲也曾數臭在亞視被迫去飯局，對於王征騷擾男藝人，她昨在電話中說：「經歷令自己成長，其他人哋啲嘢唔評論啦。」
此外，前亞視高層盛品儒昨晚與未婚妻蔡一鳳在銅鑼灣出席攝影展，對於堂兄王征被爆與梁景煌有不尋常關係，盛品儒口窒窒回應：「都驚訝。」是否知道梁景煌陪王征是計騷錢？他說：「唔清楚，我都離開咗一年半，公司嘢唔係好方便講，但佢做生意係一個叻人。」
採訪：陳杰、文國駿
