警方展開佔中大搜捕，日前開始聯絡一班佔中搞手、核心人士，邀請佢哋去警署協助調查，所謂何事，不言而喻。據知被警方聯絡嘅人士，首批將於下周一到灣仔警署助查。經常喺各大佔領區蒲頭嘅公民黨陳淑莊（Tanya）有份「打頭陣」，佢話當日下晝1點去灣仔警署助查，聽聞警方講到明屆時需要兩粒鐘，睇嚟好多嘢要Tanya「協助」。本身都係大律師嘅Tanya，話屆時會有律師陪同，八方仲聽聞，佢本來都想低調啲處理，但公民黨嘅高層就覺得唔可以俾佢孤伶伶應戰，已經動員支持者當日喺警署外面撐場。
不過，佔中發起人陳健民卻話至今仲未收到警方電話喎，但佢表明一定唔會承認組織非法集會嘅罪名，因為呢條罪涉及使用暴力，而和平佔中一向主張愛與和平囉。