踏入1月，球壇相信會有一番新景象，因為轉會窗將會重開，各大球會又係時候「血拼」一下。暫時歐洲轉會市場最矚目嘅兩位主角，咁啱都有「王子」嘅身份──費蘭度托利斯同普多斯基。托利斯由AC米蘭返番母會馬德里體育會，而普多斯基就被阿仙奴外借到國際米蘭，兩人當然都想唱番句：Prince可否不要老，再上高峯！
期待王子重現風采
30歲嘅費托同29歲嘅普多斯基，其實仍然屬當打時期，不過足球之神近年好似離棄咗佢哋，以往曾經叱咤一時嘅入波本色，今日都有啲「甩色」。由於一次又一次令球迷、教頭失望，所以大家對佢哋嘅嘲諷，基本上冇停過。我都希望佢哋兩個今次轉會，可以再次振作，重現昔日嘅王子本色。
兩位王子都已經為新球會上陣，雖然未有入波，但總算係一個好開始。當中相信以費托回歸最令佢感動，因為佢喺再同球迷見面嘅典禮入面，有多過4萬人歡迎佢。馬體會球迷冇因為托利斯近年嘅低潮而幸災樂禍，亦冇嘲諷費托要食回頭草。相反，大家對呢位隊長再次投以信任一票，體現出咩叫做同甘共苦。
至於普多斯基雖然只係後備上陣，但係踢咗36分鐘，就為球隊製造出幾次埋門，證明狀態冇問題，到底佢喺阿仙奴出現咩問題而冇得踢，相信佢自己都未必知原因，可能真係要問問雲格先知。
雖然冇咗普多斯基，但相信對阿仙奴未必有太大影響，話晒佢都唔係正選。今個星期阿仙奴會對史篤城，如果大家仲記得，上個月阿仙奴曾經作客輸2:3畀對手，令到球隊出現少少危機。一個月後再碰頭，相信雲格一定有仇報仇，加上前線連「銀河唯一」基奧特（圖）都復出，相信贏波唔係問題，不過史篤城都有一定實力，所以今場兵工廠未必大勝，小勝2:1絕對啱數。
LULU
不懂踢波愛睇波