日前簽咗兩位具有防守同得分能力嘅猛將之後，騎士周三再有大動作，宣佈換到金塊中鋒莫茲哥夫（Timofey Mozgov）；補埋內線防守，怕且騎士喺今季聯盟都幾難再搵到對手嘞。不過，新兵未落到場幫手，騎士同日就喺主場以93:105輸咗畀火箭。
JR史密夫首戰捧蛋
今場係後衞JR史密夫（J.R. Smith）加盟騎士嘅地標戰，雖然佢1分都攞唔到，但整體表現其實都唔算差。勒邦占士（LeBron James）繼續養傷，就算路夫（Kevin Love）以17分同16籃板造出「雙雙」、K艾榮（Kyrie Irving）攻入個人今季新高嘅38分，主隊都無奈輸波。K艾榮賽後就好沮喪咁話，球隊目前最需要嘅係穩定嘅防守。
有見正選中鋒華利奧（Anderson Varejao）提早收「咧」而暴露出咁大嘅內線漏洞，騎士同日宣佈用兩個受保護嘅首輪選秀權，由金塊換嚟7呎1吋嘅莫茲哥夫（另加一個今年嘅次輪選秀權），佢今季場均貢獻7.8籃板同1.2封阻，數字上拍得住華利奧，而且比起慢慢退化嘅後者，28歲嘅佢更加有活力，而且年薪只係465萬美金（約3,600萬港元），都係一個好合適嘅替補。等埋早兩日由紐約人來投嘅外圍防守專家森柏（Iman Shumpert）傷癒復出，騎士就內外防守兼備，再搵唔到輸波藉口嘞啩。另一邊廂，球隊同日裁走後衞AJ派斯（A.J. Price），大軍騰出咗一個吉位，有指係為簽入自由身嘅3分射手阿倫（Ray Allen）鋪路。
大帝或復出鬥湖人
不過，簽邊個都好，最緊要都係要等大帝占士復出領軍。已經休息咗6場嘅佢周三透露，目前感覺良好，預計唞埋今周就OK，有望喺下周四作客湖人一戰復出。上個月底啱啱過30歲生日嘅大帝話，其實自己要落場唔係話唔得嘅，不過𠵱家又未到季後賽，冇必要冒令傷勢惡化嘅風險，所以畀多啲時間身體休息。
識睇，一定係睇足英台【英波Live】：
http://soccer.appledaily.com
http://bit.ly/engballlive