呢晚谷草有薛寶力同鄭雨滇兩騎師停賽期滿復出，前者只跑頭三場，第四場開始可以返家企休息，等第二朝晨操。呢位奧地利籍公司騎師新一年首次上陣，唔甘心空手返歸，第二場四班1000米騎葉廐「勝任如意」施展渾身解數，頂住臨門如飛殺上之「勇戰」，影相贏短距離，可惜葉楚航不在港冇得拉頭馬；而「勇戰」姍姍來遲飲恨做二奶，跑三、四名分別係大熱門「手到拿來」同新勝馬「高山威龍」，全場一至四檔馬包辦四連環，貫徹谷草A欄利內檔本色。
「勝任如意」由新秀團體擁有，成員包括退休女高官俞宗怡、劉吳惠蘭及行政會議召集人林煥光太太袁轉好等，之前新秀團體養過「勝任有餘」同「勝任愉快」加埋贏咗十WIN。呢晚「勝任如意」初次渡江即贏，賽後見劉吳惠蘭高高興興拉頭馬；劉吳惠蘭曾出任商務及經濟發展局局長，2011年因患腸癌請辭，康復後今年5月重出官場，出任「公務員敍用委員會」主席，任期三年。
「勝任如意」前仗初出用薛寶力跑直路賽入Q，再出換杜滿萊冇三甲，今次用番薛寶力順利開齋，人馬合作非冠即亞。