衞冕嘅馬刺周二主場迎戰活塞，喺大好嘅領先優勢下第4節射失好幾個罰球，最終就俾對手控衞B贊寧斯（Brandon Jennings）成功絕殺，以104:105不敵呢支喺東岸排尾3嘅球隊。
活塞6連勝追熱火
馬刺今場頭3節嘅罰球命中率平均有77%，但到咗第4節突然失準（見附表），5位球員加埋有12次罰球機會，竟然只係中一半得6分，間接放生咗活塞後上反勝，班球員都話好失望。另一方面，教練普波域治（Gregg Popovich）今場都做咗幾個令人不解嘅決定，包括最後10.8秒球隊仲領先緊3分，佢叫球員犯規，對手射入兩個罰球後追到只差1分；而第4節佢又一直畀鄧肯（Tim Duncan）休息，但最後嘅關鍵界外球就畀佢負責開，傳波嘅失誤仲間接令B贊寧斯射入絕殺。不過，普帥賽後就冇多多藉口，只係話呢啲係佢自己嘅選擇。
另外，今季持續因為大腿後肌拉傷缺陣13場嘅控衞柏加（Tony Parker），今場終於復出，但只上陣13分鐘，交出3分同兩次助攻。普帥就澄清，提早收起愛將只係安全起見，佢並唔係再次觸傷舊患。
至於今場贏波嘅活塞，自從裁走前鋒J史密夫（Josh Smith）後未嘗一敗；豪取6連勝之後，目前成績為11勝23負（未計周三對小馬戰果），仲係東岸尾3，但距離第8嘅熱火得番3場半勝差，要後上追趕季後賽席位仲有機㗎。
識睇，一定係睇足英台【英波Live】：
http://soccer.appledaily.com
http://bit.ly/engballlive